Ugaasyada Iyo Odayada Ugaaslabe oo Taageeray Amarada Suldaanka Guud ee Sanaag

Hadaaftimo, 6 May 2011 (AllDhooftinle.com)

Ugaasyada Iyo Odayada Ugaaslabe Oo Taageeray Xannibaadda Uu Suldaanka Guud Ee Reer Sanaag, Suldaan Siciid, Ku Soo Rogey Iibkii Qalabka Dhismaha Dekedda Laasqoray Iyo Iyagoo Talooyin U Soo Jeediyey Suldaan Siciid Iyo Madaxa Hay'adda Horn-Relief Marwo Faadima Jibriil.

Annagoo ah Ugaasyada Iyo Odayada Ugaaslabe waxaanu taageersan nahay xannibaadda uu Suldaanka Guud ee Reer Sanaag, Suldaan Siciid Suldaan C/Salaan Suldaan Maxamuud Suldaan Cali Shire Suldaan Cawl Suldaan ... Ku soo rogey iibkii qalabka dhismaha Dekedda Laasqoray.

Annagoo ah Ugaasyada Iyo Odayada Ugaaslabe waxaannu aad uga xun nahay hakadka ku dhacay dhismihii Dekedda Laasqoray ee aynu sida ba'an ugu hanqal taageyney.

Annagoo ah Ugaasyada Iyo Odayada Ugaaslabe waxaannu ka xunnahay sida aan habooneyn ee ay u soo gudbinayaan Horn Relief xisaabtii loo ururiyey dhismaha Dekedda Laasqoray. Waxa ka muuqata qaa'imadda Horn Relief soo gudbisey xilkasnimo darro badan, taasoo innaga iska daaye gef iyo miyir beel ku noqotay qabiilooyinka Soomaaliyeed ee kale ee wax inala ururiyey ee Mareexaan iyo cid walbaba leh.

Annagoo ah Ugaasyada Iyo Odayada Ugaaslabe waxaannu ka codsaneynaa Suldaanka Guud oo aanu u nahay Abtiyaal iyo Awoowayaalba:

suldaan Siciid Suldaan C/Salaan

1- Inuu si degdeg ah u sameeyo guddida xisaab xidhka oo ka kooban dad aqoon u leh qaa'imadaha iyo xisaabaadka.

2- Inuu si degdeg ah u sameeyo guddida kaydinta qalabka iyo lacagta oo ka kooban dad amaanada xejin kara aqoonna u leh dayac tirka qalabka.

3- Inuu si degdeg ah u sameeyo guddida maamulka qalabka iyo lacagta oo loo baahan yahay iney habeeyaan mashaariicda aynu ku qabsan karo qalabkaa iyo lacagtaa, waa iney guddidani u badan tahay injineerada-dhismaha oo iyagu garan kara waxaynu qalabkaas ku qabsan karno.

4- Inuu si degdeg ah uga soo raro qalabkaas Boosaaso iyo xeebtaa daxalka badan leh, una soo raro Hadaaftimo iyo Oogo.

5- Inuu si degdeg ah dhammaan beelihii Soomaaliyeed ee ka qayb qaatay hawshaa Dekedda Laasqoaray uu BBC iyo websiteyadaba xaal iyo raalligelinba u sii mariyo.

Annagoo ah Ugaasyada Iyo Odayada Ugaaslabe waxaannu ka codsaneynaa Madaxa Hay'adda Horn-Relief Marwo Faaduma Jibriil oo aanu iyadana u nahay Abtiyaal iyo Awoowayaalba :

1- Iney si degdeg ah ugu gudbiso qalabka Dekedda Laasqoray Suldaanka Guud iyo guddidiisa kaydinta qalabka iyo lacagta.

2- Iney si degdeg ah ugu gudbiso qaa'imadda lacagta loo ururiyey Dekedda Laasqoray iyo kharashka baxay oo GAMBA-GAMBA u qoran Suldaanka Guud iyo guddidiisa xisaab xidhka.

Caaqil Caabbi

3- Iney odayadii xoolaha ururiyey meeshey doonaanba ha joogeene iyaguna si cad Suldaanka Guud iyo guddiyadiisa ugu gudbiyaan qaa'imadda xisaabihii, xoolihii iyo qalabkii ay ka soo ururiyeen gudaha dalka iyo debeddiisaba, si ay isu beri yeelaan.

WA BILLAAHI TAWFIIQ.

UGAASYADA IYO ODAYADA UGAASLABE.